– Հետաքրքիր դրվագների հետ նաև տարօրինակ պահեր էլ ենք ապրել, երիտասա՛րդ։ «Խաղից դուրս»-ում հայտնվելուց հետո ես դեռ ուշքի չէի էկել, երբ Արփին շվվացրեց, ու առաջին խաղակեսը մնաց հետևում՝ թողնելով ծնկաչոք Եվրոպա, ահասարսուռ Ամերիկա ու ոտքի կանգնող Ասիա։ Դարերով տանջված աֆրիկացիներն այս անգամ դիտորդի դերում էին, լուռ հետևում էին մեր մեծ խաղին՝ չփորձելով որևէ կերպ խառնել խաղաքարտերը։ Գլխիկոր հեռանում էի Գրողուցավի խաղադաշտից։ Գլխիկոր էի, քանի որ ջանքերս արդյունք չէին տալիս, մեր ահեղ մրցակիցը, կացինը՝ ճակատին խրված, շարունակում էր իր սև գործը։ Մտատանջ դուրս էի գալիս Գրողուցավի հիանալի արենայից, մեկ էլ տեսնեմ՝ Գիլանցը, սուպերմենի նման ձեռքը վեր պարզած, ձգվում է Մեսի փոխանցման հետևից։ Մեկ մտածեցի գոռալ՝ եղբայր, մարդն արդեն շվվացրել ա, ընդմիջման ժամն ա, մեկ էլ ասի՝ էն ինձնից լավ գիտի՝ ուր ա գնում ու ինչի հետևից։
Մեսի հետ որոշել էինք ընդմիջումը գարեջրատանն անենք ու ձեռի հետ էլ նոր մարտավարություն մշակենք։ Ընկերներ էլ էինք հրավիրել, մտածելով՝ մի խելոք բան էլ կարող ա նրանք ասեն։ Պապլավոկի մոտի գարեջրատունն էինք հասնում։ Պապլավոկը ո՞րն ա։ Դե, էն Դրամատիակական թատրոնի մոտ, էլի։ Թատրոնն ի՞նչ ա։ Չէ, բալա՛մ, ձեր սերունդը լրիվ ցնդել ա։ Ինչևէ, Պապլավոկի տեղը հիմա փոքր օդանավակայան են սարքել՝ հենց ըտեղ էր Գարեջրի ակադեմիան։ Ու չնայած էդ օրերին բոլոր կրթական հաստատությունները փակ էին, մեր խաղի ընդմիջման համար ակադեմիան հատուկ բացել էին։ Ես էի, Մեսն էր ու Արփին, հետո Գիլանցը օդերից իջավ ու միացավ թիմին։ Մեզ հետ էին Զիդանն ու Մեսսին։ Իրենք պարապ-անգործ ֆրֆռում էին, մենք էլ հետներս բերեցինք։ Մեսսին տեղավորվել էր Մեսի կողքը, Զիդանը՝ իմ, իսկ Արփիի կողքը մի բոյով «ֆուտբոլիստ» էր նստած՝ Համբարձում էր անունը։ Կազմվածքից էրևում էր, որ ուժեղ պաշտպան ա՝ կիպ, արագ, ջղային։ Ասում են 88-ից մինչ էսօր պաշտպանության հենասյունն ա հանդիսանում, միշտ պայքարների մեջ ա։ Հետաքրքիր տիպ էր էրևում, կորեական դելիկատես էր պատվիրել ու լուռումունջ վայելում էր գարեջրով։ Մի խոսքով, լավ ուժեղ փոխարինող տղա էր, պետք էղած ժամանակ մեկնումեկիս հանգիստ կարող էր փոխարինել Գրողուցավում։
Բայց ամենաուժեղը Գիլանցն էր։ Թռել-հասել էր աստղերին, էնտեղից Մուորինյոին՝ Մեսի ասած Մռմուռին, իր հետ իջացրել ու բերել էր մեզ մոտ։ Բերել էր հերիք չի, նստացրել էր հենց ու հենց Մեսի դիմաց։ Էդ էլ քիչ էր, էս Մռմուռս լիքը ամանով տարբեր պանիրներ էր պատվիրել ու Մեսի դեմը դրած ախորժալի խժռում էր։ Դե, մեր Մեսը ոչ պանիր ա սիրում, ոչ Մռմուռ։ Իրավիճակն ահավոր լարված էր, դրա համար էլ Զիզուս ոտքի կանգնեց, դե Զիդանն էլի, ու սկսեց բարձրաձայն կարդալ պարետի նոր սահմանափակումները։ Պարզվում ա, երբ դուրս գաս դարպասապահի դիմաց «ադին նա ադին», ոստիկանը կանգնացնելու ա քեզ, դու էլ պարտավոր ես հատուկ թուղթ ցույց տալ գործատուից, էս դեպքում Արփիից էլի, թե՝ «Պարո՛ն ոստիկան, դարպասապահին շատ չեմ մոտենալու, երկու մետրը պահելու եմ՝ անվտանգութայն կանոնները պաշտպանելու ու չվարակվելու նկատառումներով։ Հանգիստ խաբք եմ տալու և գնդակն ուղարկեմ անպաշտպան դարպասը։ Լա՞վ ա»։ Եվ ոստիկանի թույլտվությամբ անելիքդ անելու ես։
Զիդանը նստեց, ու էս Մռմուռը սկսեց թիմի բարոյահոգեբանական վիճակի վրա աշխատել։ Պանիրները հերթով գցում էր բերանն ու տարբեր անեկդոտներ պատմում քյավառցիների, ապարանցիների, լենինականցիների մասին։ Լավ որախացրեց մեռածը, նույնիսկ Մեսը մեկումեջ ծիծաղում էր դրա դերասանական այլևայլությունների վրա։ Մեսսին սկսեց Մեսրոպին խաբքերի մասը բացատրել։ Ընդհանրապես Մեսն ու Մեսսին շատ ընդհանուր բաներ ունեին․ երկուսն էլ ձախլիկ, երկուսն էլ ո՛չ պանիր են սիրում, ո՛չ Մռմուռին, երկուսն էլ իրենց թիմերի հույսն ու հավատը, շարժիչ ուժը, սնդիկ են, սնդիկ տնաշենները։ Ի՞նչ գլուխներդ տանեմ, երկուսն էլ հանճար են, հրաշագործ, էնի Նոու Կամպում ա «կանցերտներ» տալիս, էս մեկը՝ Գրողուցավում։
Վերջապես ոտքի ելավ Համբարձումը։ Ծանր-ծանր կանգնեց, վիզն աջ ու ձախ անելով՝ ճտտացրեց, ամեն մեկիս առանձին-առանձին տնտղեց, գարեջրի գավաթը փոքր-ինչ բարձրացրեց ու իր բամբ ձայնով սկսեց ասմունքել։
Մռմուռը՝ մայրաքաղաքից մառախլապատ
Մեղրեցի Մեսը, մորուքով Մեսսին
Մյուսները մարտական, միասնական
Մախատը մրցկացի ․․․ մտցրի՛ն։
Բոլորս ոգևորված ոտքի կանգնեցինք, գարեջրի բաժակներն ուժեղ իրար զարկեցինք ու բարձր տրամադրությամբ պատրաստվեցինք երկրորդ խաղակեսին։ Փողոցներում թևածում էր մեր մրցակից համաճարակը, իսկ մենք դեռ շարունակում էինք խաղալ։ Մենք պիտի՛ շարունակեինք խաղալ, երիտասա՛րդ։ Խաղը պետք է կայանար ցանկացած եղանակին։
